【散發女人味】華高斯基姊妹Lilly變性後首露面 撐同性戀反歧視活動 ...

Lilly變性後首次出席公開場合，現身美國同性戀反歧視聯盟傳媒頒獎禮。

《22世紀殺人網絡》（Matrix）系列著名導演華高斯基（The Wachowski）「兄弟」相繼進行變性手術，喺阿哥Larry於2012年變性改名Lana後，細佬Andy上個月亦宣佈接受咗變性手術仲改名Lilly，呢對鬼才導演由兄弟變姊弟，o依家就變姊妹。

Lilly上月公開變性後嘅照片公告呢個消息，但一直就冇公開露面，噚日佢終於喺洛杉磯舉行嘅第27屆美國同性戀反歧視聯盟傳媒頒獎禮（GLAAD Media Awards）露面，佢着住一條開胸黑色連身裙、搽咗指甲油經過一番悉心打扮赴會，散發女人味，不過高頭大碼嘅佢，就高過晒身邊嘅人起碼大半個頭，而佢呢日就憑劇集《Sense8》奪得最佳劇集。

而Taylor Swift都有現身任嘉賓，佢就負責頒獎俾澳洲同志女星Ruby Rose。